【最新到貨：新鮮滾熱辣上架】
提燈者言：廣華醫院護理教育歷史
黃文江、羅婉嫻、范永聰｜中華書局
ISBN：9789888809080｜HKD$138
現代化，通常都係一個漫長嘅過程，尤其如果你係呢片區域之內比較早就開始現代化嘅地方，更加要花好多時間喺慢慢摸索同試驗身上。好多時我哋都會直覺地，或一廂情願地覺得香港嘅現代化，好似喺1841年嘅時候就完成咗咁，好似一開咗埠，呢個地方就自動成為「文明」同「現代」嘅「大都會」。實際上，即使係由最有效率嘅改革者主政，所有嘅改變都必然係要時間醞釀、建立同完成。而香港嘅護士培訓體系，就係一個例子。
香港其實好早就已經有醫院，開埠七年之後，政府就已經喺西營盤建立咗國家醫院。但係有醫院唔代表會有護士，係㗎，呢間聽落好巴閉嘅國家醫院係無護士嘅，因為現代護士專業，要等多好幾年之後先由南丁格爾喺克里米亞戰爭中奠基，到1857年，香港性病醫院開始運作，先開始出現護士。但有護士，都未等於有護士教育，畢竟最早嘅所謂護士教育，就係護士長自己收留幾個「徒弟仔」喺身邊教，毫無體制可言。一直到1922年，廣華醫院先正式招收「看護生」，建立護士訓練課程。如果我哋好理所當然咁覺得「既然到有現代醫院咁就梗係有護士，自然都會有護士學校㗎啦」嘅時候，原來香港最早嘅護士訓練課程，已經係第一間醫院建立超過七十年之後嘅事。
所以現代香港並唔係奉旨地隨住開埠而出現，係要有好多唔同嘅前輩一手一腳去建立，而建立護士培訓體系嘅呢啲前輩，就係呢本書要講嘅故事。透過口述歷史，呢啲曾經喺廣華醫院護士體系入面工作過嘅人，就可以一點一滴咁講返自己嘅經歷，從而拼湊出比較完整嘅圖像。
💡書名嘅「提燈者」，係西方對護士嘅雅稱。呢個講法，源自於當年報章描繪南丁格爾提住燈巡視病房嘅情形。
【店長精選：唔好果本唔敢揀】
戰後香港精神科口述史
李兆華、潘佩璆、潘裕輝｜三聯書店
ISBN：9789620441974｜HKD$98
近期社會對精神病嘅討論多咗，多咗人理解到暴力事件同精神病無直接關係。但係「精神病人」等於「黐線佬」等於「會發狂斬人」呢個刻板印象，究竟係點嚟？一直以嚟政府對精神病嘅處理，以及公共衛生嘅政策，有幾大嘅影響？喺殖民早期，莫講話社會大眾，連政府都假定精神病患者有暴力傾向，甚至將佢哋當做罪犯咁處理。喺未有精神病治療設施之前，所有嘅精神病人都一律被監禁於牢獄之中，然後遣送出境。要到1875年，香港先有一間「臨時癲人院」，1884年先有第一間精神病院。但係一直到二十世紀初，香港對待精神病人嘅方式，都係以羈留禁錮為主。
踏入二十世紀，隨住香港人口繼續暴增，西營盤高街精神病院明顯完全無法容納眾多精神病患，但係呢間醫院一直到1961年建立青山醫院之前，都係香港唯一嘅精神病院，大部分嘅病人最終都要轉送廣州芳村精神病院，可見政府對精神病治療嘅重視係幾咁低。一直到戰後，港中邊境關閉，香港嘅精神病人無辦法送去中國，政府先開始注意呢個問題，情況隨住青山醫院同葵涌醫院投入服務以慢慢改善。
政府嘅思維開始轉變，但民間呢？呢度必須提到一個重要嘅事件，就係1982年嘅元州邨事件。由於缺乏跟進服務，一位精神分裂症患者喺無再複診食藥之下，突然同家人起衝突，繼而拔刀殺死母親和妹妹，更走到附近一間幼稚園襲擊師生，最終導致六人死亡。基於社會輿論嘅壓力，政府不得不改變政策，倒退翻去將所有「暴力傾向」精神病人禁錮喺病院嘅時代，而所謂「暴力傾向」，又往往係精神科醫生一念之間嘅判斷，比法庭更不公正，而咁樣嘅制度，亦加深社會對精神科病人嘅偏見。
💡由於當時香港娼妓盛行，十九世紀嘅精神病人好大部分都係先感染梅毒，然後病毒擴散到腦部而變成精神病。
此篇書訊刊於每週一發出的獅墨書訊，歡迎免費訂閱
Comments